“Prezident İlham Əliyevin “Əl-Ərəbiyyə” telekanalına verdiyi müsahibə Azərbaycanın regionda sülhün təmin olunmasına nə qədər ciddi yanaşdığını bir daha göstərdi. Dövlət başçımız açıq şəkildə bəyan etdi ki, Vaşinqtonda imzalanmış sənəd iki dövlət arasında qarşılıqlı olaraq ərazi bütövlüyünün tanınmasına əsaslanır və bu sənəd Ermənistan üçün sülh və sabit inkişafın yeganə təminatıdır”.

Bunu mətbuata açıqlamasında Milli Məclisin deputatı Göydəniz Qəhrəmanov deyib.

O bildirib ki, əgər Ermənistan daxili siyasi dəyişikliklərdən sonra bu razılaşmadan geri çəkilməyə cəhd edərsə, bu, ilk növbədə onun öz maraqlarına zərbə olacaq. Belə bir addım beynəlxalq ictimaiyyət, o cümlədən ABŞ, Avropa İttifaqı, Türkiyə və ərəb ölkələri ilə münasibətlərin pisləşməsinə gətirib çıxara bilər.

“Azərbaycan artıq bütün dünyaya sübut edib ki, beynəlxalq hüquqa əsaslanan mövqedə dayanır, öz ərazi bütövlüyünü təmin edib və regionda dayanıqlı sülhün tərəfdarıdır. Bu reallıq Ermənistan rəhbərliyi tərəfindən düzgün qiymətləndirilməlidir.

Prezident İlham Əliyevin də vurğuladığı kimi, Vaşinqtonda imzalanan razılaşma konkret şəxslərə bağlı deyil, dövlətlər arasında hüquqi öhdəlikdir. Ermənistanın gələcək hakimiyyəti kim olursa-olsun, bu sənədin şübhə altına alınması həmin ölkəni daha ağır nəticələrlə üz-üzə qoyacaq.

Azərbaycan sülhə, əməkdaşlığa və qarşılıqlı hörmətə sadiqdir. Lakin eyni zamanda dövlətimizin suverenliyi və ərazi bütövlüyü heç bir halda müzakirə mövzusu ola bilməz. Prezidentin müsahibədə ifadə etdiyi mövqe bu istiqamətdə həm xalqımızın, həm də dövlətimizin prinsipial iradəsini əks etdirir”.