Qırğızıstanda Joqorku Keneşə (birpalatalı parlament) keçirilən növbədənkənar seçkilərdə səsvermə başa çatıb.

APA xəbər verir ki, bunu respublikanın Mərkəzi Seçki Komissiyasının sədri Tınçtık Şaynazarov bildirib.

Mərkəzi Seçki Komissiyasının məlumatına görə, seçicilərin yekun siyahısına 4 294 243 vətəndaş daxil edilib.

***

09:02

Qırğızıstanda növbədənkənar parlament seçkilərində iki saatlıq səsvermə nəticəsində seçici fəallığı 3,89% təşkil edib.

APA xəbər verir ki, bu barədə Qırğızıstan Mərkəzi Seçki Komissiyasının sədri Tınçtık Şaynazarov məlumat verib.

Qırğızıstanda seçki məntəqələri yerli vaxtla saat 08:00-da açılıb. "Hazırkı ilin 30 noyabr tarixində saat 10:00-a olan seçici aktivliyi barədə məlumatı sizə təqdim etməyə icazə verin. Saat 10:00-a olan məlumata görə 167 min 72 seçici səs verib, faiz nisbətində bu göstərici 3,89% təşkil edir", – deyə o bildirib.

***

06:16

Qırğızıstanda Jooqorku Keneşə (birpalatalı parlament) növbədənkənar seçkilər təyin edilib.

APA xəbər verir ki, 90 deputat mandatı uğrunda 460 namizəd mübarizə aparacaq.

Seçkilər bu dəfə yeni qaydalarla keçiriləcək. İyunda ölkə prezidenti Sadır Japarovun təsdiqlədiyi dəyişikliklərə əsasən parlament artıq majoritar sistem üzrə formalaşdırılacaq. Ölkə 30 dairəyə bölünüb və hər dairədən üç deputat seçiləcək.

Seçkilərin keçirilməsi üçün seçici fəallığı ilə bağlı heç bir hədd nəzərdə tutulmayıb. Seçkiyə gələnlərin sayından asılı olmayaraq proses baş tutmuş sayılacaq.

Jooqorku Keneşin əvvəlki, yeddinci çağırışı 2021-ci ildə qarışıq, yəni həm partiya siyahıları, həm də majoritar dairələr üzrə seçilmişdi.