Dayanıqlı inkişafın maliyyələşdirilməsi üçün dörd əsas istiqamət vacibdir.

"APA-Economics” xəbər verir ki, bunu İslam İnkişaf Bankı Qrupunun PGARM direktoru Seyid Hüseyn Qədri Bakıda keçirilən İslam İnkişaf Bankının İllik Toplantıları çərçivəsində “8-ci Dayanıqlı İnkişaf Məqsədləri Dialoqu: Dayanıqlı inkişaf üçün innovativ maliyyələşmə – yardım və ənənəvi Rəsmi İnkişaf Yardımının (ODA) hüdudlarından kənarda” mövzusunda təşkil olunan sessiyada bildirib.

"Birincisi, keyfiyyətli layihələr portfelinin formalaşdırılmasıdır. Əsas məsələ davamlı layihələr bazasının yaradılmasıdır. İkincisi, standartlaşdırmadır. Hazırda Kuala-Lumpurdakı investorla Londondakı investor eyni anlayış və təriflərdən istifadə etmir. Bu isə ciddi problemdir. Hətta London Fond Birjası və Beynəlxalq Kapital Bazarları Assosiasiyası ilə Yaşıl Sukuk prinsiplərinin uyğunlaşdırılması istiqamətində işləyərkən də bunun nə qədər vacib olduğunu gördük".

O əlavə edib ki, üçüncü istiqamət layihələrin yaradılması və sonradan bazara çıxarılmasıdır: "Burada çoxtərəfli inkişaf bankları və inkişaf maliyyə institutları özəl sektoru yalnız layihələrin hazırlanmasına deyil, həm də onların maliyyə bazarlarında yerləşdirilməsinə cəlb etməlidirlər. MDB-lərin borc alətləri ilə bağlı müzakirələr də məhz bununla bağlıdır. Nəhayət, dördüncü istiqamət qarışıq maliyyələşmə (blended finance) modelidir. Müxtəlif tərəfdaşlarla, müxtəlif institutlarla və müxtəlif səviyyələrdə əməkdaşlıq vacibdir. Buraya daxili resursların səfərbər olunması, regional maliyyələşmə imkanları, xeyriyyə fondları, zəkat və digər maliyyə alətlərinin cəlb edilməsi daxildir".

O vurğulayıb ki, bütün bu elementlərin birlikdə tətbiqi bizə gələcəyə daha nikbin baxmağa imkan verə bilər: "Ümid edirəm ki, bu yanaşmalar qarşıdakı dövrdə mühüm nəticələr verəcək".