ABŞ Prezidenti Donald Tramp Federal Təhqiqatlar Bürosunun (FTB) “Nvidia” şirkətinin baş direktoru Censen Huanqla bağlı yaranmış qalmaqalın bəzi aspektlərini araşdırdığını bildirib.

APA xəbər verir ki, Tramp bu barədə Ağ Evdə keçirdiyi mətbuat konfransında danışıb.

ABŞ Prezidentindən Huanqın münasibətdə olduğu qadının Çin kəşfiyyatına işləməsi barədə iddiaları gələn həftə Çində keçiriləcək Asiya-Sakit Okean İqtisadi Əməkdaşlıq Təşkilatının (APEC) sammitində Çin lideri Si Cinpinlə müzakirə edib-etməyəcəyi soruşulub.

“Xeyr, düşünmürəm. Ola bilsin, sədr Si özü məndən bu barədə soruşsun. Mən Censeni çox yaxşı tanıyıram. Onu çox dürüst insan hesab edirəm. O, möhtəşəm Amerika şirkəti yaradıb”, – Tramp bildirib.

Prezidentin sözlərinə görə, FTB məsələni müəyyən qədər fərqli kontekstdə araşdırır.

“Biz bu məsələni aydınlaşdıracağıq. Bildiyimə görə, FTB bununla məşğuldur və düşünürəm ki, onun üçün hər şey yaxşı olacaq”, – ABŞ lideri qeyd edib.

Tramp may ayında Çinə səfəri zamanı Huanqın sözügedən münasibətindən xəbərdar olmadığını da açıqlayıb.

“Mən bu gün ondan soruşdum. O isə həmin şəxsin casus olması barədə heç bir məlumatının olmadığını qəti şəkildə bildirdi. Mən ona həqiqətən inanıram”, – Prezident vurğulayıb.

Qeyd edək ki, Huanqın münasibətdə olduğu qadının Çin kəşfiyyatı ilə əlaqəli olması barədə iddialar hələlik təsdiqlənmiş fakt kimi təqdim olunmur.