Qətərin dövlət ərazi sularında baş verən helikopter qəzasından sonra itkin düşən şəxslərlə bağlı davam edən axtarış-xilasetmə əməliyyatları çərçivəsində helikopterdə olan 7 nəfərdən 6-sının tapılması mümkün olub.

Qatar News Agency-in məlumatına görə, bunu ölkənin Daxili İşlər Nazirliyi bildirib.

Tapılan şəxslərin həlak olduğu təsdiqlənib, xüsusi təyinatlı qruplar isə sonuncu itkin şəxsin tapılması üçün intensiv axtarışları davam etdirir.

Nazirlik bazar günü X platformasında yaydığı açıqlamada həlak olanların ailələrinə dərin hüznlə başsağlığı verib.

***

12:36

Qətərə məxsus hərbi helikopterin texniki nasazlıq səbəbindən ölkənin sularında qəzaya uğraması nəticəsində azı altı nəfər həlak olub.

Al Jazeera-nın məlumatına görə, bu barədə hökumət məlumat yayıb.

Helikopterdə ümumilikdə yeddi nəfər olub. Qətərin Daxili İşlər Nazirliyi bazar günü bildirib ki, itkin düşən sonuncu şəxsin tapılması üçün axtarış-xilasetmə əməliyyatları davam edir.

Ölkənin Müdafiə Nazirliyi daha əvvəl X platformasında yaydığı açıqlamada qeyd edib: “Qətərə məxsus helikopter planlı uçuş zamanı texniki nasazlıqla üzləşib və nəticədə dövlətin ərazi sularında qəzaya uğrayıb.”