“Prezident İlham Əliyevin “Əl-Ərəbiyyə” telekanalına müsahibəsində Türk Dövlətləri Təşkilatı ilə bağlı səsləndirdiyi fikirlər Azərbaycanın bu qurumdakı xüsusi rolunu və strateji əhəmiyyətini bir daha vurğulayır. Dövlət başçımızın qeyd etdiyi kimi, Türk Dövlətləri Təşkilatı artıq sadəcə regional əməkdaşlıq platforması deyil, beynəlxalq arenada mühüm aktora çevrilmək potensialına malikdir”.

Mediaplus.az xəbər verir ki, bunu KİV-ə açıqlamasında millət vəkili Göydəniz Qəhrəmanov deyib.

“Azərbaycanın həm Türkiyə ilə imzaladığı Şuşa Bəyannaməsi, həm də digər üzv dövlətlərlə müttəfiqlik və strateji tərəfdaşlıq sazişləri Türk dünyasının siyasi, iqtisadi və təhlükəsizlik baxımından inteqrasiyasına ciddi töhfə verir. Bu gün təşkilat üzvlərinin ortaq tarixi, mövcud təbii sərvətləri, artan iqtisadi imkanları və sabit siyasi münasibətləri birlikdə böyük güc formalaşdırır.

Azərbaycanın coğrafi mövqeyi, nəqliyyat və enerji dəhlizlərində oynadığı mühüm rol isə Türk dünyasının iqtisadi əlaqələrinin möhkəmlənməsində həlledici amillərdəndir. Prezident İlham Əliyevin də vurğuladığı kimi, bu əməkdaşlıq konkret layihələr, investisiyalar, enerji, logistika və mədəniyyət sahələrində daha da dərinləşdirilməlidir.

Türk Dövlətləri Təşkilatının gələcəkdə qlobal miqyasda mühüm iştirakçılardan birinə çevrilməsi həm regionun sabitliyinə, həm də beynəlxalq təhlükəsizliyə xidmət edəcək. Azərbaycan bu prosesin önündə gedən, təşəbbüsləri ilə təşkilatın strateji xəttini müəyyənləşdirən dövlətlərdən biridir.

Bu yanaşma bir daha sübut edir ki, Azərbaycan təkcə regionda deyil, beynəlxalq müstəvidə də sabitləşdirici, əməkdaşlıq üçün geniş imkanlar yaradan etibarlı tərəfdaşdır”, – deyə deputat qeyd edib.