Avropanın müxtəlif ölkələrindən olan turistlər ABŞ-yə girərkən sərt tədbirlərlə üzləşirlər. Onları istirahət əvəzinə – deportasiya həbsxanası gözləyir. Hətta qanunla heç bir problemi olmayanlar da həbs edilirlər. Saxlanılanlar arasında Böyük Britaniya, Kanada, Fransa və Almaniya vətəndaşları var.

Oxu.Az-ın məlumatına görə, bu barədə “Bild” yazıb.

Nəşr səyyahların başına gələnlər barədə məlumat verib:

"Tək bel çantası ilə səyahət edən 28 yaşlı britaniyalı Rebekka Börk Kanadadan ABŞ-yə girməyə çalışarkən saxlanılıb. Ailəsinin sözlərinə görə, viza ilə bağlı qarışıqlıq olub. O, deportasiya təcridxanasına yerləşdirilib və orada 19 gün keçirib. Qızın atası ona yalnız soyuq düyü, kartof və lobya verildiyini, telefona isə, demək olar ki, çıxışı olmadığını bildirib. İndi qız Böyük Britaniyaya qayıdıb, lakin etiraf etdiyi kimi, yaşadıqlarını unutmaq ona çətindir.

35 yaşlı kanadalı Casmin Muney də oxşar vəziyyətlə üzləşib. O, iş vizasını uzatmağa çalışarkən Meksika ilə sərhəddə saxlanılıb. Qohumlarının sözlərinə görə, təxminən iki həftə keçirdiyi Arizona deportasiya mərkəzində alçaldıcı şəraitdə – bir kamerada 30 nəfərlə birlikdə qalıb. Qadın həbs müddətini qollarında qandal və ayaqlarında zəncirlə keçirməyə məcbur olub.

Hyustondakı konfransda iştirak etmək üçün səfər edən fransalı alimlə də bağlı qalmaqal baş verib. Fransa hakimiyyətinin bildirdiyinə görə, səbəb onun telefonunda "Tramp haqqında tənqidi fikirlər" olub. ABŞ hakimiyyəti isə öz növbəsində, ittihamları rədd edib və bildirilib ki, alim Amerika nüvə mərkəzindən müəyyən məlumatlar əldə edərək məxfilik qaydalarını pozub".

Bu arada Almaniya Xarici İşlər Nazirliyi vətəndaşlar üçün tövsiyələrini yeniləyib – turistlərə ABŞ-yə girərkən mümkün saxlanılma və deportasiya barədə xəbərdarlıq edilir.